Epekto ng Paggamit ng Wikang Ingles sa Senior High (2017-2018) PDF

Politeknikong Unibersidad ng Pilipinas Senior High School Department Sta. Mesa, Maynila S.Y. 2017-2018 **EPEKTO NG PAGGAMIT NG WIKANG INGLES BILANG** **WIKANG PANTURO SA ASIGNATURANG** **AGHAM AT MATEMATIKA** **SA SENIOR HIGH** **SCHOOL** **PANGALANG NG INSTITUSYON: [POLITEKNIKONG NIBERSIDA...

Politeknikong Unibersidad ng Pilipinas Senior High School Department Sta. Mesa, Maynila S.Y. 2017-2018 **EPEKTO NG PAGGAMIT NG WIKANG INGLES BILANG** **WIKANG PANTURO SA ASIGNATURANG** **AGHAM AT MATEMATIKA** **SA SENIOR HIGH** **SCHOOL** **PANGALANG NG INSTITUSYON: [POLITEKNIKONG NIBERSIDAD NG PILIPINAS]** **ADRES/KINATATAYUAN : [MABINI KAMPUS, STA.MESA, MAYNILA]** **Mga Mananaliksik**: Rhiana N. Andres Abigail Go Hannah Jane Ecotan Thrixia Dela Cruz Johanna Ingalla Angeline Ortiz **Petsang Nasimulan**: October 26, 2017 **Petsang Natapos** : October 30, 2017 **PANIMULA** **KALIGIRAN NG PANANALIKSIK** Ang pag-aaral na ito ay ukol sa positibo at negatibong epekto ng wikang Ingles bilang wikang panturo sa iba't-ibang parte ng bansa lalo na sa mga mag-aaral na Senior High School, partikular sa asignaturang Agham at Matematika. Noong 1901, sa pangunguna ng Philippine Commission, ginawang opisyal na wikang panturo ang wikang Ingles sa bisa ng Batas blg. 74. Subalit noong 1925 ay napagtanto nila na hindi ito naging epektibo sa pagkakatuto ng mga Pilipino sapagkat noong panahong iyon ay hindi pa masyadong pamilyar ang mga Pilipino sa wikang Ingles. Ang impormasyon na ito ay ayon sa Monroe Educational Survey Commission. Ngunit sa paglipas ng panahon ay naging laganap na ang wikang Ingles sa bansa at dahil dito ay ginagamit na ito bilang wikang panturo sa iba't-ibang asignatura tulad ng Agham at Matematika, at nadagdagan ng iba pang asignatura ang ginagamitan ng wikang Ingles tulad ng Literatura at Pilosopiya. Ang wika, ayon kay Henry Gleason, ay dinamiko o nagbabago. Ito ay lumalago dahil na rin sa impluwensiya ng iba't-ibang tao. Noong unang panahon ay wikang Filipino lang ang ginagamit bilang wikang panturo sapagkat karamihan sa mga Pilipino ay hindi pa ganoon kapamilyar sa wikang Ingles. Subalit sa paglipas ng panahon ay natuto din ang mga Pilipino sa tulong ng pananakop ng mga dayuhan katulad ng Espanyol, Amerikano, at Hapon. Ang wikang Ingles ang ginagamit bilang wikang panturo sa asignaturang Agham at Matematika sapagkat mas madali itong maintindihan at maunawaan, dahil nasanay na din tayo sa pag-aral ng paksa sa wikang Ingles dulot ng pananakop ng mga banyaga. Ang pag-aaral na ito ay masusing sinusuri at sinasaliksik na may layuning malaman ang positibo at negatibong epekto ng paggamit ng wikanga wikang Ingles bilang wikang panturo sa dalawang asignaturang ito, at kung epektibo ba ang pagkatuto nila gamit ang wikang ito. **PAGLALAHAD NG SULIRANIN** Ang pag-aaral na ito ay naglalayong tumugon sa mga sumusunod na katanungan: 1. Sa paanong paraan nakakaapekto ang paggamit ng Ingles bilang wikang panturo sa asignaturang Agham at Matematika sa mga mag aaral na nasa Senior High School? 2. Ano ang benepisyo ng paggamit ng ingles bilang wikang panturo? 3. Anu-ano ang mga positibo at negatibong epekto nito sa mga mag-aaral? 4. Bakit mas ginagamit ang wikang Ingles bilang midyum sa pagtuturo sa asignaturang Agham at Matematika kaysa sa sariling wika? **KAHALAGAHAN NG PAG-AARAL** Ang kahalagahan ng pag-aaral na ito ay upang malaman ang positibo at negatibong epekto ng paggamit ng wikang Ingles bilang wikang panturo sa asignaturang Agham at Matematika sa mga mag-aaral na nasa Senior High School. Ang mga mananaliksik ay lubos na umaasang ito makakatulong sa mga mag-aaral dahil sa pamamagitan nito masusuriing mabuti kung ano nga ba ang mas higit na magpapaunlad ng edukasyon sa ating bansa kung mas makabubuti ba ang paggamit ng wikang Ingles bilang wikang panturo o mas mapapaunlad ang edukasyon sa Pilipinas sa paggamit ng ating pambansang wika bilang midyum sa pagtuturo lalo na sa asignaturang Agham at Matematika na siyang kabilang sa tinatawag na "Major Subjects". Ang pag-aaral na ito ang magsisilbing susi tungo sa mas maunlad na kinabukasan ng sambayanang Pilipino. Tulad na lamang ng mga bansang Japan at China na kilala sa pagpapahalaga ng sariling wika na syang naging daan sa pagkakaisa at naging susi sa kanilang pag-unlad sa edukasyon, industriya at kultura. Ang pag-aaral na ito ay naglalayong magbigay linaw sa ating kaisipan na marapat bigyan ng higit na pagpapahalaga ang sarili nating wika bago ang banyaga. **SAKLAW AT LIMITASYON** Ang pag-aaral na ito ay sumasaklaw sa mga mag-aaral na nasa Senior High School at naglalayong malaman ang epekto ng paggamit ng wikang Ingles bilang wikang panturo sa asignaturang Agham at Matematika sa positibo at negatibong dulot nito sa kanila. **MGA KAUGNAY NA PAG-AARAL AT LITERATURA** Sa bahagi ng papel na ito, itinala ng mga mananaliksik ang ilang mga pag-aaral at literature na may kaugnayan sa paksang tinatalakay sa pananaliksik na ito na tumatalakay sa positibo at negatibong epekton ng paggamit ng wikang Ingles bilang wikang panturo. **Filipino o Ingles: Ano ang dapat na gamitin sa pagtuturo sa mga paaralan?** **Published** August 16, 2017 1:42pm Dalawang panukalang batas ang nakabinbin ngayon sa Kamara de Representantes na naglalayong palakasin ang wikang Ingles at gamitin ito bilang paraan sa pagtuturo sa mga paaralan. Pero tutol sa panukala ang Komisyon sa Wikang Filipino dahil labag umano ito sa Saligang Batas at hindi maka-Pilipino. Sa ilalim ng House Bill No. 5091 na inihain ni dating Pangulo at ngayo\'y Pampanga Rep. Gloria Macapagal-Arroyo,  nais ng mambabatas na mahasa at mapahusay pa ang kakayahan ng mga mag-aaral sa pagsusulat at magsasalita ng dayuhang wika. Nais niya na gamitin ang Ingles bilang pangunahing medium of instruction sa araling Ingles, Matematika at Agham simula sa grade 3 sa lahat ng pampubliko at pribadong paaralan. Samantalang wikang Filipino naman ang gagamitin sa asignaturang Filipino at Araling Panlipunan. Nais din ni Arroyo na hindi bababa sa 70 porsiyento ng oras ng pagtuturo  sa mga paaralan sa secondary level ay dapat nakalaan sa paggamit ng wikang Ingles. May hiwalay ding panukalang batas \[House Bill 5397\] na inihain si Parañaque City Rep. Eric Olivarez, para palakasin din ang paggamit ng Ingles sa pagtuturo sa grade school, high school, college, at vocational education. Idinahilan niya na dapat mapanatili at mapagbuti pa ng mga Pinoy ang husay sa dayuhang wika na halos ginagamit sa buong mundo para sa pakikipagkalakalan at pagtatrabaho, lalo na sa mga malalaking industriya tulad ng Business process outsourcing. Batay umano sa annual Business English Index (BEI) noong 2012, isang pag-aaral na ginawa umano ng Global English, at tanging ang Pilipinas ang nakakuha ng iskor na mataas sa 7.0 mula sa 76 bansa. \"Young minds must be trained to be fluent in the language being used worldwide as this will serve as their stepping stone in a guaranteed good career in the future,\" paliwanag ng mambabatas sa kaniyang panukala. **FILIPINO ANG DAPAT** Para sa KWF na pinamumunuan ang Pambasansang Alagad ng Sining na si Virgilio Almario, hindi naaayon sa Saligang Batas ang mungkahi na dayuhang wika, sa halip na pambansang wikang Filipino, ang gagamitin bilang pangunahing paraan sa pagtuturo. Sa position paper ng komisyon na inihanda bilang pagtutol sa panukala ni Arroyo, sinabi na muli lang binuhay ng HB 5091 ang mga dati nang panukala na inihain \[tulad ng HB 8460 noong 2009\], na Ingles ang gamitin sa pagtuturo pero ibinasura na noon ng Senado. Idinagdag nito na nakasaad sa Saligang Batas na Filipino ang wikang pambansa, at dapat itong linangin, payabungin at pagyamin. \"Alinsunod sa mga tadhana ng batas at sang-ayon sa nararapat na maaaring ipasya ng Kongreso, dapat magsagawa ng mga hakbangin ang pamahalaan upang ibunsod at puspusang itaguyod ang paggamit ng Filipino bilang paraan ng opisyal na komunikasyuon at bilang wika ng pagtuturo sa sistemang pang-edukasyon,\" ayon sa posisyon ng KWF. Tinawag din ng KWF na anti-Filipino ang panukala at sumasalungat sa mga prinsipyo ng pagtuturo na itinatakda ng UNESCO, na nagsasaad na ang patakarang pang-edukasyon na ang mga bata, lalo na ang mga nasa mababang baytang ay mas matututo sa kanilang sinasalitang wika sa halip na banyagang wika. Kung pagbabatayan din umano ang implementasyon ng MTB-MLE (Mother Tongue-Based Multilingual Education) ng Department of Education Order \#74, series of 2009, at ang nakapaloob sa bagong K-12 Curriculum Program sa ilalim ng Republic Act 10533, at ng Enhanced Basic Education Act of 2013, ang panukala na isinusulong ni Arroyo ay hindi na umano kailangan. Paalala din ng komisyon, kung may mga pangamba ang ilan na humina sa wikang Ingles ang mga Pinoy, higit umanong dapat na ikatakot kung ang sariling wika ng mga Pilipino ang maglalaho.\-- **FRJimenez, GMA News** **PAMAMARAANG GINAMIT** **Ang pamamaraang ginamit sa pagbuo ng pag-aaral na ito ay deskriptibong pananaliksik kung saan inilarawan ang mga suliranin at naglalayong alamin ang epeketo ng paggamit ng wikang Ingles sa asignaturang Agham at Matematika sa mga mag-aaral na nasa Senior High School.** **PAGLALALATAG NG KONKLUSYON** Sa pag-aaral na ito ay nakakuha ng positibo at negatibong pananaw at epekto ang mga mananaliksik mula sa mga mag-aaral ng Senior High School ukol sa paggamit ng wikang Ingles bilang wikang panturo sa asignaturang Agham at Matematika. Sa positibong pananaw ay nagbibigay daan ang wikang Ingles bilang panturo sa pagiging bihasa sa pagunawa at paggamit ng salitang ito na nagsisilbing daan tungo magandang pakikipagkapwa sa mga banyagang bansa at may mga mag-aaral na nagsasabing mabuti ang epekto nito sa kanila sa paraang mas tumataas ang lebel ng kanilang kumpiyansa sa sarili sa pagsasalita ng wikang Ingles. Ang negatibo namang epekto nito sa ibang mag-aaral ay nahihirapan silang unawain ang mga leksiyon sa asignaturang Agham at Matematika dahil hindi sila ganoon kagaling sa pagunawa ng wikang Ingles at napagtanto ng mga mananaliksik na mas mabuting gamitin ang pambansang wika bilang midyum sa pagtuturo lalo na sa asignaturang Agham at Matematika dahil mas pamilyar tayo sarili nating wika kaya't mas madaling mauunawaan ang mga leksyon at ito ang siyang magiging daan sa mas maganda at maunlad na edukasyon ng ating bansa.