Kahulugan at Layunin ng Panitikan

Panitikan

• Ayon sa Bagong Pangkolehiyong Diksyunaryo ni Webster, ang panitikan ay ang kabuuan o kalipunan ng mga pinagyamang isinulat o nailimbag sa isang tanging wika ng mga tao.
• Ayon kina Bro. Azarias sa kanyang Pilosopiya ng Literatura, pagpapahayag ito ng mga damdamin ng tao hinggil sa iba't ibang bagay sa daigdig, sa pamumuhay, sa pamahalaan, sa lipunan na may kaugnayan sa kaluluwa at Dakilang Lumikha.

Ang Tunay na Panitikan

• Ang tunay na panitikan ay isang matapat na paglalarawan ng buhay na isinasagawa sa paraang masining.
• Ito ay maayos na pagtutugma-tugma ng mga karanasan ng tao, alinsunod sa ninanais na paraan ng pagpapahayag.
• Ayon kay Long (1971), naitala ng pinakamabubuting damdamin ng tao ang isang tunay na panitikan.
• Sang-ayon kay Dr. Rufino Alejandro (1949), ang panitikan ay katuturang bungang-isip na isinatitik.

Mga Layunin sa Pag-aaral ng Panitikan

• Malaman ng mga tao ang kanilang kalinangan at kasaysayan.
• Mabatid nila ang kalakasan o kahinaan ng kanilang paniniwala at pag-uugali.
• Maging matatag at matibay ang kanilang pagkalahi.
• Malaman ang mga kapintasan at kagalingang pampanitikan upang lalong mapayabong.
• Magkaroon ng pagmamalasakit sa ating sariling panitikan.

Kalagayang Nakapangyayari sa Panitikan

• Klima - may kinalaman sa pag-iisip at pag-uugali ng tao.
• Hanapbuhay - gawaing pang-araw-araw at mga tungkulin ng tao.
• Kinatitirhan - ang kinatitirhang pook ng lahi ay nagtatakda sa hilig at takbo ng talasalitaan at himig ng tayutay ng panitikan.
• Lipunan at pulitika - mga ugaling panlipunan at mga simulaing pampulitika at pamahalaang nagdadala ng kahilingan at kabihasnang nagpapasama sa panitikan ng isang bansa.
• Relihiyon at edukasyon - ang tayog, lalim, at lawak ng isang panitikan ay nakukuha rin sa pananampalatayang dala ng relihiyon at sa kabihasnan at kalinangang naituturo ng pilosopiya ng edukasyon ng bansa.